વિડીયોઃ જ્યારે જાહ્નવી કપૂરે ફોટોગ્રાફરની કરી લીધી મજાક, પૂછી નાખ્યું આવું

ફિલ્મ ‘ધડક’ જ્યારે આવી હતી ત્યારે તે દરમિયાન ઈશાન ખટ્ટરે મીડિયા સાથેની વાતચીતમાં જણાવ્યું હતું કે તેની કો-સ્ટાર જાહ્નવી કપૂર કેટલી મજાક કરે છે અને ખૂબ જ મસ્તીખોર છે. હવે આ બાબતની સાબિતી પણ સામે આવી છે. જાહ્નવીનો એક વિડીયો સોશિયલ મીડિયા પર સામે આવ્યો છે. જેમાં તે એક ફોટોગ્રાફરની મજાક કરતી જોવા મળે છે.

વિડીયોમાં જાહ્નવી એક પ્રોડક્શન હાઉસની બહાર નીકળતી જોવા મળે છે. આ દરમિયાન પાપારાઝી તેને તસવીર પડાવવાનું કહે છે. જોકે, એ હસતા હસતા પોતાની કાર તરફ આગળ વધે છે. કારના દરવાજા પાસે પહોંચી તો એક પાપારાઝી ફોટોગ્રાફર તેની પાછળ આવે છે જેના પર જાહ્નવી સવાલ કરે છે કે,’કારમાં આવવું છે અમારી સાથે?’ આ સાંભળીને તેને કેમેરા પર રેકોર્ડ કરીને પાપારાઝીએ જણાવ્યું કે,’નહીં. થેંક્યૂ મેમ’ જે પછી એક્ટ્રેસ હસતા હસતા કારમાં બેસીને ગેટ બંધ કરી દે છે.

થોડા દિવસ પહેલા જ એક વિડીયો સામે આવ્યો હતો. જેમાં જાહ્નવી જિમ બહાર ઉભા રહીને પાપારાઝી પર ભડકતી જોવા મળી હતી. જે પછી જાહ્નવીની ખૂબ જ ટીકા થઈ હતી. આ ઘટના પછી એક્ટ્રેસ મીડિયા સામે હંમેશા હસતાં જ જોવા મળે છે. જો વાત કરવામાં આવે કામની તો જાહ્નવીએ તાજેતરમાં ગુંજન સક્સેના પર બની રહેલી બાયોપિક ફિલ્મનું શૂટિંગ પૂરું કર્યું છે. આ સાથે જ તે ફિલ્મ ‘રુહઅફ્ઝા’,’દોસ્તાના 2′ અને ‘તખ્ત’માં જોવા મળશે.